नुवाकोट । रसुवाको भोटेकोशी बाढीबाट क्षतिग्रस्त नुवाकोटको बेलकोटगढीस्थित पिमलटार–जागाराम झोलुङ्गे पुलको पुनर्निर्माण सम्पन्न भएको छ। पुनर्निर्माणपछि पुलबाट आवतजावत पूर्णरूपमा सञ्चालनमा आएको छ।
बाढीले क्षति पुर्याएका पुलका बटारिएका लठ्ठा सोझ्याउने, ह्यान्ड रेल केबल फेर्ने तथा स्टिल डेक र बिम जडान गर्ने काम सम्पन्न गरी हिजै जाली राख्ने कार्यसमेत पूरा गरिएको हो।
पूर्वाधार विकास मन्त्रालयअन्तर्गतको स्थानीय पूर्वाधार विकास विभागले बाढी प्रभावित क्षेत्रमा क्षतिग्रस्त झोलुङ्गे पुलको मर्मत तथा पुनर्निर्माणलाई तीव्रता दिएको जनाएको छ।
यसैक्रममा धादिङ, नुवाकोट र गोरखामा रहेका थप १२ वटा झोलुङ्गे पुलको मर्मत कार्य पनि अन्तिम चरणमा पुगेको जनाइएको छ।
