काठमाडौं । नेपालको अर्थतन्त्रका केही प्रमुख सूचकमा सुधार देखिएको छ। मूल्यवृद्धि (मुद्रास्फीति) ५.९६ प्रतिशत रहेको छ भने देशमा रहेको विदेशी मुद्रा सञ्चिति बढेर ३९ खर्ब ४६ अर्ब २३ करोड रुपैयाँ पुगेको छ।
नेपाल राष्ट्र बैंकका अनुसार उक्त विदेशी मुद्रा सञ्चितिले करिब १८.८ महिनासम्म देशको वस्तु तथा सेवा आयात धान्न पुग्ने अवस्था रहेको छ। अमेरिकी डलरमा भने विदेशी मुद्रा सञ्चिति २५ अर्ब ८४ करोड पुगेको छ।
विदेशबाट नेपालीहरूले नेपाल पठाउने रकम अर्थात् रेमिट्यान्स पनि बढेको छ। चालु आर्थिक वर्षको साउन महिनामा मात्रै २ खर्ब १५ अर्ब ५ करोड रुपैयाँ रेमिट्यान्स नेपाल भित्रिएको छ। अघिल्लो अवधिको तुलनामा रेमिट्यान्स नेपाली रुपैयाँमा २१.२ प्रतिशत र अमेरिकी डलरमा १०.२ प्रतिशतले बढेको हो।
त्यस्तै, विदेशमा निर्यात ६१.७ प्रतिशतले बढेको छ। विदेशबाट नेपालमा सामान ल्याउने आयात भने ३१ प्रतिशतले बढेको छ।
देशले विदेशबाट कमाएको र विदेशमा खर्च गरेको रकमको हिसाबमा पनि अवस्था सकारात्मक देखिएको छ। चालु खाता ९४ अर्ब ५९ करोड रुपैयाँ बचतमा रहेको छ भने शोधनान्तर स्थिति ९० अर्ब ३४ करोड रुपैयाँ बचतमा रहेको छ।
सरकारको आम्दानी र खर्चतर्फ पनि तथ्यांक सार्वजनिक भएको छ। यस अवधिमा नेपाल सरकारले ४१ अर्ब ८९ करोड रुपैयाँ खर्च गरेको छ भने ९२ अर्ब २३ करोड रुपैयाँ राजस्व उठाएको छ।
बैंक तथा वित्तीय संस्थामा रहेको कुल रकम अर्थात् निक्षेप भने समीक्षा अवधिमा ०.३ प्रतिशतले घटेको छ। तर एक वर्षको तुलना गर्दा निक्षेप १४.५ प्रतिशतले बढेको छ। त्यस्तै, निजी क्षेत्रलाई बैंक तथा वित्तीय संस्थाले दिएको कर्जा ०.४ प्रतिशतले बढेको छ भने वार्षिक आधारमा कर्जाको वृद्धि ७ प्रतिशत रहेको छ।
बैंकहरूबीच हुने कारोबारमा प्रयोग हुने औसत ब्याजदर २.७५ प्रतिशत रहेको छ। त्यस्तै, वाणिज्य बैंकहरूले ग्राहकबाट लिने निक्षेपको औसत ब्याजदर ३.१५ प्रतिशत र ऋण दिँदा लिने औसत ब्याजदर ६.४८ प्रतिशत रहेको छ।
समग्रमा हेर्दा विदेशी मुद्रा सञ्चिति, विप्रेषण, निर्यात, चालु खाता र शोधनान्तर बचतजस्ता क्षेत्रमा सकारात्मक अवस्था देखिएको छ।
