काठमाडौं । वैदेशिक रोजगारीका लागि आकर्षक तलबको प्रलोभन देखाउँदै विभिन्न देश पठाइदिन्छु भन्दै रकम ठगी गरेको आरोपमा प्रहरीले तीन जनालाई पक्राउ गरेको छ।
पक्राउ पर्नेमा काठमाडौंको टोखा नगरपालिका–५ बस्ने तेह्रथुम घर भएका ३५ वर्षीय नगेन्द्र भेटवाल, कागेश्वरी मनोहरा नगरपालिका–८ बस्ने बर्दिया घर भएका ४४ वर्षीय समुन्द्रबहादुर थापा र कागेश्वरी मनोहरा नगरपालिका–७ बस्ने पाँचथर घर भएका ४४ वर्षीय कुमार खतिवडा रहेका छन्।
प्रहरीका अनुसार नगेन्द्रले जापान पठाइदिन्छु भन्दै एक जना पीडितबाट १० लाख रुपैयाँ, समुन्द्रबहादुरले कम्बोडिया पठाइदिन्छु भन्दै एक जना पीडितबाट ७ लाख रुपैयाँ र कुमारले युएई पठाइदिन्छु भन्दै एक जना पीडितबाट १ लाख रुपैयाँ लिएका थिए। रकम लिएपछि उनीहरू सम्पर्कविहीन भएको भन्दै पीडितहरूले प्रहरीमा उजुरी दिएका थिए।
उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले नगेन्द्रलाई सोमबार टोखा नगरपालिका–५ बाट तथा समुन्द्रबहादुरलाई मंगलबार कागेश्वरी मनोहरा नगरपालिका–९ र कुमारलाई कागेश्वरी मनोहरा नगरपालिका–७ बाट पक्राउ गरेको हो।
पक्राउ परेका तीनै जनालाई आवश्यक अनुसन्धान तथा कानुनी कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।
