काठमाडौं। प्रधानमन्त्री दैवी प्रकोप राहत कोषमा करिब १२ अर्ब रुपैयाँ मौज्दात रहेको पाइएको छ। अर्थ मन्त्रालयका अनुसार कोषका विभिन्न ९ वटा खातामा ८ अर्ब ७६ करोड ६९ लाख रुपैयाँ तथा २ वटा डलर खातामा २ करोड ११ लाख ८ हजार ४७१ अमेरिकी डलर मौज्दात रहेको छ।
डलरमा रहेको रकमलाई प्रतिडलर १५० रुपैयाँ ८८ पैसाका दरले नेपाली रुपैयाँमा रूपान्तरण गर्दा कोषमा उपलब्ध कुल मौज्दात ११ अर्ब ९५ करोड १७ लाख रुपैयाँ पुगेको मन्त्रालयले जनाएको छ।
रसुवा-भोटेकोशी बाढीपछि कोषमा ७ अर्ब ६८ करोड ४४ लाख रुपैयाँ र २ करोड ५ लाख २२ हजार ४२३ अमेरिकी डलर संकलन भएको छ। उक्त रकम विपद् आउनुअघिको २ अर्ब ८ करोड २४ लाख रुपैयाँ मौज्दात बाहेकको हो।
मन्त्रालयका अनुसार भदौ २३ गते मात्रै राहत कोषमा ३० करोड ६२ लाख रुपैयाँ र १ लाख १२ हजार ३२ अमेरिकी डलर प्राप्त भएको थियो।
यसैबीच, विपद्मा राहत तथा उद्धार कार्य सञ्चालनका लागि भदौ १६ गते राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई १ अर्ब रुपैयाँ हस्तान्तरण गरिएको छ।
