काठमाडौँ । नेपाली राष्ट्रिय क्रिकेट टोलीका कप्तान दीपेन्द्रसिंह ऐरी आईसीसी टी-२०आई अलराउन्डर वरियतामा एक स्थान तल झरेका छन्।
आईसीसीले मंगलबारसम्मको प्रदर्शनलाई आधार बनाएर बुधबार सार्वजनिक गरेको नयाँ वरियतामा दीपेन्द्र तेस्रो स्थानबाट चौथोमा झरेका हुन्। उनको रेटिङ अंक भने २५६ मै यथावत् छ।
पछिल्लो समय नेपाली टोलीले टी-२०आई अन्तर्राष्ट्रिय खेल नखेलेका कारण दीपेन्द्रको वरियतामा अंक परिवर्तन नभएको हो। श्रीलंकाविरुद्ध हालै सम्पन्न टी-२०आई शृङ्खलामा इंग्ल्यान्डका विल ज्याक्सले गरेको प्रदर्शनका आधारमा उनी दीपेन्द्रलाई पछि पार्दै तेस्रो स्थानमा उक्लिएका छन्।
टी-२०आई अलराउन्डर वरियताको शीर्ष स्थानमा जिम्बाबेका सिकन्दर राजा कायमै छन्। उनको रेटिङ अंक ३२१ छ। पाकिस्तानका सायम अयुब २८१ अंकसहित दोस्रो स्थानमा छन्।
अफगानिस्तानका अजमतुल्लाह ओमरजाइ पाँचौँ स्थानमा छन्।
नेपाली टोलीले अब शुक्रबारदेखि एसियन गेम्सअन्तर्गत क्रिकेट प्रतियोगितामा प्रतिस्पर्धा गर्दैछ। एसियन गेम्समा हुने टी-२०आई खेलमा खेलाडीले गर्ने प्रदर्शनका आधारमा आगामी वरियतामा फेरबदल हुन सक्नेछ।
दीपेन्द्र नेपाली टोलीका प्रमुख अलराउन्डरका रूपमा पछिल्लो समय अन्तर्राष्ट्रिय क्रिकेटमा प्रभावशाली प्रदर्शन गर्दै आएका छन्। आगामी खेलमा उनको प्रदर्शनले व्यक्तिगत वरियतासँगै नेपाली क्रिकेटको अन्तर्राष्ट्रिय उपस्थिति थप बलियो बनाउने अवसरसमेत रहनेछ।
काठमाडौं । नेपाली कांग्रेसले आगामी १५औँ महाधिवेशनअन्तर्गत वडा तहदेखि केन्द्रीय तहसम्म हुने विभिन्न निर्वाचनमा उम्मेदवारी दर्ता गराउने उम्मेदवारका लागि शुल्क निर्धारण गरेको छ । कांग्रेस केन्द्रीय निर्वाचन समितिले जारी गरेको ‘१५औँ महाधिवेशन निर्वाचन निर्देशिका, २०८३’ को अनुसूची–२१ मा विभिन्न पदका लागि उम्मेदवारी शुल्क तोकिएको हो।
निर्देशिकाअनुसार सबैभन्दा कम वडा कार्यसमिति सदस्य तथा क्षेत्रीय प्रतिनिधिका लागि ५०० रुपैयाँ शुल्क तोकिएको छ भने सबैभन्दा बढी केन्द्रीय सभापति पदका लागि ४० हजार रुपैयाँ उम्मेदवारी शुल्क निर्धारण गरिएको छ।
वडा कार्यसमितिको सभापतिका लागि १ हजार, उपसभापति, सचिव तथा सहसचिवका लागि ७ सय र सदस्यका लागि ५ सय रुपैयाँ शुल्क तोकिएको छ।
त्यस्तै, गाउँपालिका कार्यसमितिको सभापतिका लागि ५ हजार, उपसभापति तथा सचिवका लागि २ हजार, सहसचिवका लागि १ हजार ५ सय र सदस्यका लागि १ हजार रुपैयाँ शुल्क निर्धारण गरिएको छ। नगरपालिकामा सभापतिका लागि ५ हजार, उपसभापति तथा सचिवका लागि ३ हजार, सहसचिवका लागि २ हजार र सदस्यका लागि १ हजार रुपैयाँ तोकिएको छ।
उपमहानगरपालिका तथा महानगरपालिका कार्यसमितिको सभापतिका लागि ७ हजार, उपसभापति तथा सचिवका लागि ४ हजार, सहसचिवका लागि ३ हजार र सदस्यका लागि २ हजार रुपैयाँ उम्मेदवारी शुल्क कायम गरिएको छ।
प्रदेशसभा क्षेत्रीय कार्यसमितिको सभापतिका लागि ७ हजार, उपसभापति तथा सचिवका लागि ४ हजार, सहसचिवका लागि ३ हजार र सदस्यका लागि २ हजार रुपैयाँ शुल्क तोकिएको छ। प्रदेश अधिवेशन प्रतिनिधिका लागि भने ५ हजार रुपैयाँ शुल्क निर्धारण गरिएको छ।
प्रतिनिधिसभा क्षेत्रीय कार्यसमितिको सभापतिका लागि १० हजार, उपसभापति तथा सचिवका लागि ५ हजार, सहसचिवका लागि ४ हजार र सदस्यका लागि २ हजार रुपैयाँ शुल्क तोकिएको छ। केन्द्रीय महाधिवेशन प्रतिनिधिका लागि ७ हजार तथा महासमिति सदस्यका लागि ५ हजार रुपैयाँ उम्मेदवारी शुल्क तोकिएको छ।
जिल्ला कार्यसमितिको सभापतिका लागि १५ हजार, उपसभापति तथा सचिवका लागि ७ हजार, सहसचिवका लागि ६ हजार र सदस्यका लागि ३ हजार रुपैयाँ शुल्क निर्धारण गरिएको छ।
प्रदेश कार्यसमितिको सभापतिका लागि २० हजार, उपसभापति तथा महामन्त्रीका लागि १५ हजार, सहमहामन्त्रीका लागि १० हजार र सदस्यका लागि ५ हजार रुपैयाँ शुल्क तोकिएको छ।
यसैगरी, केन्द्रीय कार्यसमितिको सभापतिका लागि ४० हजार, उपसभापति तथा महामन्त्रीका लागि ३० हजार, सहमहामन्त्रीका लागि २० हजार र केन्द्रीय सदस्यका लागि ११ हजार रुपैयाँ उम्मेदवारी शुल्क निर्धारण गरिएको छ।
कांग्रेसले १५औँ महाधिवेशन आगामी २०८३ असोज १६ देखि १९ गतेसम्म गर्ने गरी निर्वाचन कार्यतालिका सार्वजनिक गरिसकेको छ।
काठमाडौं । सिन्धुलीको मरिण गाउँपालिका–४, साहानस्थित निर्माणाधीन जियान फुड्स प्रा.लि.मा कार्यरत ८८ जना विदेशी नागरिकको व्यावसायिक भिसा रद्द गरिएको छ ।
छेन्दु टाइन फुड लिमिटेडको आर्थिक साझेदारीमा निर्माण भइरहेको जियान फुड्स प्रा.लि. (नेपाल हिट प्रोसेस्ड बफेलो मिट एक्स्पोर्ट टु चाइना प्रोजेक्ट) मा कार्यरत विदेशी नागरिकहरूले अन्य कम्पनीको नाममा व्यावसायिक भिसा लिएर भिसाको उद्देश्यविपरीत काम गरेको पाइएको भन्दै अध्यागमन विभागले उनीहरूको भिसा रद्द गरेको हो ।
अध्यागमन विभागले बुधबार जारी गरेको विज्ञप्तिमा उनीहरूलाई प्रचलित अध्यागमन ऐन, २०४९ बमोजिम जरिबाना गरी नेपालबाट निष्कासन गर्ने प्रक्रिया अघि बढाइएको जनाएको छ ।
विभागका अनुसार पछिल्लो अनुगमनका क्रममा केही विदेशी नागरिकहरू आफूले भिसा प्राप्त गर्न सिफारिस तथा स्वीकृति लिएको व्यवसाय वा लगानीको उद्देश्यभन्दा फरक प्रकृतिको रोजगारी, श्रम तथा अन्य कार्यमा संलग्न भएको पाइएको थियो । त्यसपछि विभागले सम्बन्धित निकायसँगको समन्वयमा अनुगमनलाई तीव्रता दिएको जनाएको छ ।
नेपालमा व्यापारिक वा औद्योगिक व्यवसायमा लगानी गर्ने इजाजतप्राप्त विदेशी नागरिक वा त्यस्ता संस्थाका अधिकृत प्रतिनिधिलाई सम्बन्धित निकायको सिफारिसमा व्यावसायिक भिसा जारी गर्ने व्यवस्था छ । नेपालमा उत्पादित वस्तु खरिद गरी निकासी गर्ने विदेशी नागरिकलाई समेत व्यावसायिक भिसा उपलब्ध गराउने कानुनी व्यवस्था रहेको विभागले स्पष्ट पारेको छ ।
अध्यागमन नियमावली, २०५१ अनुसार व्यावसायिक भिसा प्राप्त गर्ने विदेशी नागरिकले जुन उद्देश्यका लागि भिसा लिएको हो, सोही उद्देश्यअनुसार नेपालमा बस्नुपर्ने हुन्छ । व्यावसायिक भिसा रोजगारी, श्रम वा अन्य असम्बन्धित कार्यमा प्रयोग गर्न पाइँदैन ।
अध्यागमन विभागले सबै विदेशी नागरिकलाई आफूले प्राप्त गरेको भिसाको उद्देश्य र सर्तअनुसार मात्र गतिविधि सञ्चालन गर्न आग्रह गरेको छ । साथै, उद्योग, कम्पनी, प्रतिष्ठान तथा रोजगारदातालाई पनि उपयुक्त भिसा र आवश्यक स्वीकृतिबिना विदेशी नागरिकलाई रोजगारीमा संलग्न नगराउन सचेत गराएको छ ।
विभागले अध्यागमन कानुन तथा अन्य प्रचलित कानुनविपरीतका गतिविधिमा विदेशी नागरिक वा सम्बन्धित पक्ष संलग्न भएको पाइएमा प्रचलित कानुनअनुसार कारबाही गरिने जनाएको छ ।
काठमाडाै । मौसम पूर्वानुमान महाशाखाले आगामी असोज ९ गते शुक्रबारदेखि असोज ११ गते आइतबारसम्म गण्डकी र लुम्बिनी प्रदेशका केही स्थानमा मेघगर्जन, चट्याङ र हावाहुरीसहित भारीदेखि धेरै भारी वर्षा हुने सम्भावना रहेको जनाएको छ। एक–दुई स्थानमा भने अति भारी वर्षा समेत हुन सक्ने महाशाखाको पूर्वानुमान छ।
महाशाखाका अनुसार मधेश प्रदेश तथा कोशी, बागमती र सुदूरपश्चिम प्रदेशका थोरै स्थानमा पनि मेघगर्जन, चट्याङ र हावाहुरीसहित भारीदेखि धेरै भारी वर्षा हुने सम्भावना छ। कर्णाली प्रदेशका केही स्थानमा समेत भारी वर्षा हुन सक्ने जनाइएको छ। देशका अधिकांश स्थानमा मेघगर्जन र चट्याङसहित मध्यम वर्षाको सम्भावना रहेको छ।
उत्तर अन्डमान सागर तथा आसपासको क्षेत्रमा विकसित न्यून चापीय क्षेत्र हाल बंगालको खाडीको मध्य भू–भाग आसपास रहेको छ। उक्त प्रणाली थप शक्तिशाली बन्दै डीप डिप्रेसन (बलियो न्यून चापीय क्षेत्र) मा परिणत भई पश्चिम–उत्तरपश्चिम दिशातर्फ सर्ने सम्भावना रहेको महाशाखाले जनाएको छ।
यस मौसम प्रणालीको प्रभावका कारण बुधबारदेखि कोशी, बागमती र गण्डकी प्रदेशमा वर्षाको गतिविधि बढ्दै जाने अनुमान गरिएको छ।
सम्भावित भारी वर्षाका कारण भू–क्षय, बाढी, पहिरो तथा गेग्रान बहावको जोखिम बढ्न सक्ने महाशाखाले जनाएको छ। शहरी तथा तराई क्षेत्रमा डुबानको जोखिम रहनुका साथै ठूला तथा साना नदी, नाला र खोलामा पानीको सतह बढ्न सक्ने सम्भावना छ।
वर्षाका कारण दैनिक जनजीवनसँगै कृषि, स्वास्थ्य, पर्यटन, सडक तथा हवाई यातायात प्रभावित हुन सक्ने तथा नदी आसपास भइरहेका निर्माण कार्यमा समेत असर पर्न सक्ने भएकाले सर्वसाधारण तथा सम्बन्धित निकायलाई आवश्यक सतर्कता र पूर्वतयारी अपनाउन महाशाखाले आग्रह गरेको छ।
यस्तै, केही स्थानबाट धानबाली भित्र्याउने समयबारे मौसमसम्बन्धी जानकारी माग भइरहेको भन्दै महाशाखाले सम्बन्धित कृषि विज्ञको सल्लाहअनुसार आवश्यक कार्य गर्न अनुरोध गरेको छ।
मौसम प्रणालीको प्रभावका कारण देशका हिमाली भू–भागमा भारी हिमपात समेत हुन सक्ने भएकाले पर्वतारोही तथा हिमाली क्षेत्रमा रहेका सम्बन्धित सबैलाई उच्च सतर्कता अपनाउन आग्रह गरिएको छ।
