पोखरा । पोखरा अन्तर्राष्ट्रिय विमानस्थलबाट संयुक्त अरब इमिरेट्स (यूएई) को दुबईमा नियमित अन्तर्राष्ट्रिय उडान सञ्चालन हुने भएको छ।
पोखरा अन्तर्राष्ट्रिय विमानस्थल नागरिक उड्डयन कार्यालयका अनुसार Flydubai ले आगामी २३ सेप्टेम्बर २०२६ (२०८३ असोज ७ गते) देखि दुबई–पोखरा–दुबई रुटमा नियमित अन्तर्राष्ट्रिय उडान सञ्चालन गर्ने गरी उडान तालिका स्वीकृत भएको छ।
स्वीकृत उडान तालिकाअनुसार दुबईबाट प्रस्थान गरेको Flydubai को Flight No. FZ1165/2266 Boeing 737 NG (Max8/Max9) विमान नेपाली समयअनुसार साँझ ६:१५ बजे पोखरा अन्तर्राष्ट्रिय विमानस्थलमा अवतरण गर्नेछ।
त्यसैगरी, सोही विमान साँझ ७:१५ बजे यात्रुसहित पोखराबाट दुबईका लागि प्रस्थान गर्ने जनाइएको छ।
पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सञ्चालन हुन थालेसँगै पोखरा र अन्तर्राष्ट्रिय गन्तव्यबीचको हवाई सम्पर्क थप विस्तार हुने अपेक्षा गरिएको छ। विशेषगरी वैदेशिक रोजगारी, पर्यटन तथा व्यवसायका लागि दुबई आवतजावत गर्ने यात्रुहरूलाई यसबाट प्रत्यक्ष लाभ पुग्ने देखिन्छ।
नागरिक उड्डयन प्राधिकरणअन्तर्गत पोखरा अन्तर्राष्ट्रिय विमानस्थल नागरिक उड्डयन कार्यालयले उक्त उडान सञ्चालन सम्बन्धमा सम्बन्धित निकायलाई जानकारी गराएको हो।
