उदयपुर । उदयपुरको कटारी नगरपालिका–६ बाँकेटारस्थित शान्ति वनबाट प्रहरीले ठूलो परिमाणमा अवैध लागूऔषध गाँजा बरामद गरेको छ। प्रहरीले १ हजार १ सय २२ किलो ६७ ग्राम गाँजासहित तीन जनालाई सोमबार बिहान पक्राउ गरेको हो।
पक्राउ पर्नेमा ताप्ली गाउँपालिका–१ डाँडागाउँका ५५ वर्षीय रामबहादुर मगर, २१ वर्षीय नेकबहादुर मगर र ४६ वर्षीय पृथ्वीराज मगर रहेका छन्।
इलाका प्रहरी कार्यालय कटारीबाट खटिएको प्रहरी टोलीले बा.१६ च ५२६९ नम्बरको बोलेरो गाडी तथा जंगलका विभिन्न स्थानमा लुकाइछिपाइ राखिएको अवस्थामा ५२ वटा बोरामा रहेको गाँजा फेला पारेको थियो।
गाँजा बरामद गरेसँगै प्रहरीले तीनै जनालाई पक्राउ गरी घटनाबारे थप अनुसन्धान अघि बढाएको जनाएको छ। प्रहरीले बरामद गाँजा ओसारपसार तथा कारोबारमा उनीहरूको संलग्नताबारे अनुसन्धान गरिरहेको छ।
काठमाडौं । रसुवामा आएको विनाशकारी बाढी तथा पहिरोका कारण मृत्यु हुनेको संख्या ९ सय ५१ पुगेको छ। नेपाल प्रहरीले सोमबार दिउँसो ५ बजेसम्म विभिन्न जिल्लाबाट ९ सय ५१ जनाको शव फेला परेको जनाएको छ।
प्रहरीका अनुसार फेला परेका शवमध्ये रसुवामा ३२, नुवाकोटमा ९५, धादिङमा ५६, चितवनमा २ सय ८२, गोरखामा ६५, तनहुँमा ३८, नवलपरासी पूर्वमा २ सय १६, नवलपरासी पश्चिममा १ सय ६३ तथा भारतमा ४ जना रहेका छन्।
बाढी तथा पहिरोका कारण प्रभावित क्षेत्रमा प्रहरीले उद्धार तथा खोजी कार्यलाई तीव्रता दिएको जनाएको छ। बाढीको जोखिममा रहेका विभिन्न जिल्लाका घरपरिवारलाई सुरक्षित स्थानमा स्थानान्तरण गर्ने, विभिन्न निकाय तथा स्थानीयवासीसँग समन्वय गरी आवश्यक उद्धार तथा खोजी गर्ने काम भइरहेको प्रहरीले जनाएको छ।
काठमाडौं । बाढी प्रभावित क्षेत्रका नेपाल टेलिकमका सेवाग्राहीका लागि उपलब्ध गराइएको निःशुल्क सञ्चार सेवा अर्को सूचना/व्यवस्था नआएसम्म निरन्तर रहने भएको छ।
नेपाल टेलिकमका अनुसार प्रभावित क्षेत्रका सेवाग्राहीले प्रतिदिन असीमित Voice Call, 2 GB Data र ५० वटा SMS निःशुल्क प्रयोग गर्न सक्नेछन्।
टेलिकमले विपद्को समयमा आवश्यक सम्पर्क तथा सूचना आदानप्रदान सहज बनाउन उक्त सुविधा उपलब्ध गराइएको जनाएको छ। सेवाग्राहीलाई आवश्यकताअनुसार मात्र निःशुल्क सेवा प्रयोग गर्न तथा आवश्यक सम्पर्कलाई प्राथमिकता दिन अनुरोध गरिएको छ।
त्यस्तै, विपद्का बेला आधिकारिक सूचनामात्र विश्वास गर्न नेपाल टेलिकमले आग्रह गरेको छ।
आपतकालीन तथा आवश्यक सहयोगका लागि १२३४ | १०० | १११४ मा सम्पर्क गर्न सकिने समेत टेलिकमले जनाएकाे छ ।
