ललितपुर । नेपाली कांग्रेसले क्रियाशील सदस्यता अध्यावधिक (नवीकरण) गर्ने अवधि पुनः थप गरेको छ। पार्टीको केन्द्रीय कार्यालय, बी.पी. स्मृति भवन, ललितपुरमा सम्पन्न सदस्यता व्यवस्थापन केन्द्रीय समितिको बैठकले उक्त निर्णय गरेको हो।
पार्टीका महामन्त्री एवं सदस्यता व्यवस्थापन केन्द्रीय समितिका संयोजक प्रदीप पौडेलको अध्यक्षतामा बसेको बैठकले देशभरबाट प्राप्त सुझाव तथा मागलाई ध्यानमा राख्दै क्रियाशील सदस्यता अध्यावधिक गर्ने अन्तिम म्याद २०८३ साल जेठ २८ गते राति १२:०० बजेसम्म कायम गर्ने निर्णय गरेको जनाएको छ।
नेपाली कांग्रेसले पछिल्ला दिनहरूमा सदस्यता अध्यावधिकको कार्य देशभर उत्साहजनक रूपमा अघि बढिरहेको उल्लेख गर्दै विभिन्न तहबाट थप समय आवश्यक रहेको जानकारी प्राप्त भएपछि अवधि थप गरिएको स्पष्ट पारेको छ।
समितिले निर्धारित समयभित्र अनिवार्य रूपमा आफ्नो क्रियाशील सदस्यता अध्यावधिक गर्न सम्पूर्ण सम्बन्धित सदस्य तथा कार्यकर्तालाई आग्रह गरेको छ।
यस निर्णयसँगै सदस्यता नवीकरण गर्न बाँकी रहेका कार्यकर्ताहरूलाई आवश्यक प्रक्रिया पूरा गर्न थप अवसर प्राप्त भएको नेपाली कांग्रेसले जनाएको छ।
नयाँ दिल्ली। राष्ट्रिय स्वतन्त्र पार्टी (रास्वपा) का सभापति रवि लामिछाने भारतीय जनता पार्टी (भाजपा) को निमन्त्रणामा पाँचदिने भारत भ्रमणका क्रममा नयाँ दिल्ली पुगेका छन्। दिल्ली विमानस्थलमा उनलाई भाजपाका नेताहरूले भव्य स्वागत गरेका थिए।
भाजपाका अध्यक्ष नितिन नवीनको निमन्त्रणामा भएको यस भ्रमणलाई नेपाल–भारत सम्बन्ध तथा दुई देशका प्रमुख राजनीतिक दलहरूबीचको संवाद विस्तारका रूपमा हेरिएको छ। भ्रमणका क्रममा लामिछानेले भाजपाका शीर्ष नेताहरू, भारत सरकारका उच्च अधिकारीहरू तथा विभिन्न राजनीतिक व्यक्तित्वहरूसँग भेटवार्ता गरेका छन्।
भ्रमणकै क्रममा भारतीय प्रधानमन्त्री नरेन्द्र माेदीसँग भएको भेटमा नेपाल–भारत सम्बन्ध, विकास सहकार्य तथा क्षेत्रीय सहयोगका विविध विषयमा छलफल भएको बताइएको छ। भारतीय पक्षले नेपाललाई आफ्नो प्राथमिक साझेदारका रूपमा हेर्ने दृष्टिकोण पुनः व्यक्त गरेको जनाइएको छ।
दिल्लीमा आयोजित प्रवासी नेपालीहरूसँगको अन्तरक्रिया कार्यक्रममा उल्लेखनीय सहभागिता देखिएको थियो। भारतका विभिन्न राज्यबाट आएका नेपालीहरूले लामिछानेलाई स्वागत गर्दै नेपालको सुशासन, विकास र राजनीतिक सुधारप्रतिको आफ्नो समर्थन व्यक्त गरेका थिए।
राजनीतिक विश्लेषकहरूका अनुसार यस भ्रमणले रवि लामिछानेको अन्तर्राष्ट्रिय राजनीतिक पहुँच र कूटनीतिक सम्बन्धलाई थप मजबुत बनाएको छ। प्रवासी नेपाली समुदायमाझ देखिएको उत्साह र समर्थनले उनको राजनीतिक प्रभाव र लोकप्रियतामा थप ऊर्जा थपिएको चर्चा भइरहेको छ।
विश्लेषकहरूको भनाइमा लामिछानेलाई पछिल्लो समय नयाँ पुस्ताका एक ऊर्जावान तथा उदाउँदा राजनीतिक नेताका रूपमा हेरिन थालेको छ। भारत भ्रमणले उनको अन्तर्राष्ट्रिय सम्बन्ध विस्तारसँगै नेपालको समकालीन राजनीतिमा उनको भूमिकाबारे थप चर्चा सुरु भएको छ।
