काठमाडौं । संघीय संसद प्रतिनिधि सभाको दोस्रो अधिवेशन अन्तर्गत बैठक मगलबार बिहान ११ बजे बस्ने भएको छ। बैठकमा प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्र सभामुखले पढेर सुनाउने कार्यसूची रहेको छ।
यसैगरी, आर्थिक वर्ष २०८३/०८४ का लागि विनियोजन विधेयकका सिद्धान्त र प्राथमिकतामाथिको छलफललाई निरन्तरता दिइने र छलफलमा उठेका प्रश्नहरूको जवाफ अर्थमन्त्री डा. स्वर्णिम वाग्लेले दिने कार्यक्रम तय गरिएको संसद सचिवालयले जनाएको छ।
प्रतिनिधि सभाको बैठकमा सरकारको आगामी बजेट तथा नीति प्राथमिकताबारे व्यापक छलफल हुने अपेक्षा गरिएको छ।
काठमाडाै । युवा सशक्तीकरण र शिक्षाप्रतिको आफ्नो प्रतिबद्धता अनुसार, एनसेल फाउन्डेसनले प्रोजेक्ट शिक्षासँगको सहकार्यलाई निरन्तरता दिँदै यो वर्ष पनि माध्यमिक शिक्षा परीक्षा (एसईई)मा उत्तीर्ण भएका विद्यार्थीहरूका लागि देशव्यापी ‘एनसेल एसईई छात्रवृत्ति’ प्रदान गर्ने घोषणा गरेको छ । यो कार्यक्रमले नेपालभरका प्रतिभाशाली विद्यार्थीहरूलाई अवसरका नयाँ ढोकाहरू खुला गर्दछ ।
“एनसेल फाउन्डेसनमा हामी शिक्षा देशको भविष्य निर्माण गर्ने एक आधारभूत स्तम्भ हो भन्नेमा विश्वास राख्छौँ । प्रोजेक्ट शिक्षासँगको यस सहकार्यमार्फत हामी एसईई उत्तीर्ण युवा विद्यार्थीहरूलाई उनीहरूको सपना पूरा गर्न सहयोग गर्दै उच्च शिक्षाका लागि गुणस्तरीय शिक्षामा पहुँच सुनिश्चित गर्न चाहन्छौँ । भौगोलिक अवस्था र आर्थिक परिस्थितिले युवाहरूको भविष्य निर्धारण गर्नु हुँदैन भन्ने हाम्रो विश्वास हो । प्रदेशस्तरीय परीक्षा र पारदर्शी छनोट प्रक्रियामार्फत हामी त्यस्ता विद्यार्थीहरूसम्म पुगिरहेका छौँ, जसमा क्षमता छ तर अवसरको अभाव छ । यस पहलमार्फत हामी सुदृढ र समावेशी भविष्य निर्माणमा योगदान पुर्याइरहेका छौँ,” एनसेलकी कर्पोरेट कम्युनिकेसन एन्ड सस्टेनेबिलिटी डाइरेक्टर विशाखा लक्ष्मी खड्काले भनिन् ।
डोटी । डोटी जिल्लाको जोरायल गाउँपालिका वडा नं. २ मा राष्ट्रिय स्वतन्त्र पार्टीको संगठन विस्तार कार्यक्रम सम्पन्न भएको छ। जिल्ला सदस्य कबिराम खत्रीको संयोजकत्वमा आयोजित कार्यक्रममा पार्टीका विभिन्न तहका प्रतिनिधि तथा कार्यकर्ताको उल्लेखनीय उपस्थिति रहेको थियो।
कार्यक्रममा पार्टीका प्रवास सम्पर्क विभाग प्रमुख धर्मराज जोशी, तमिलनाडु प्रवास समिति कोषाध्यक्ष देव धामी, कैलाली निर्वाचन क्षेत्र नं. ५ संयोजक दिल्ली राज भट्ट, पालिका संयोजक निराजन बिष्ट, पालिका सचिव विनोद सिंह बोहोरा तथा डोटी-कैलाली सम्पर्क प्रतिनिधि दिनेश बोगटीको उपस्थिति रहेको थियो।
वडा संयोजक प्रेम रावलको अध्यक्षतामा सम्पन्न कार्यक्रममार्फत पार्टीको संगठन विस्तार गर्दै ११ सदस्यीय वडा समिति गठन गरिएको जनाइएको छ। कार्यक्रममा सहभागी वक्ताहरूले पार्टी संगठनलाई वडा तहसम्म सुदृढ बनाउँदै जनअपेक्षा अनुरूप वैकल्पिक राजनीतिक अभ्यासलाई प्रभावकारी रूपमा अगाडि बढाउने प्रतिबद्धता व्यक्त गरेका थिए।
पालिका सचिव विनोद सिंह बोहोराका अनुसार संगठन विस्तार अभियानलाई आगामी दिनमा अझ तीव्र बनाइने र पार्टीलाई जनस्तरसम्म मजबुत रूपमा विस्तार गरिने लक्ष्य लिइएको बताउनुभयको छ।
रूपन्देही । रूपन्देहीको तिलोत्तमा नगरपालिका-१० स्थित कान्छिबजारमा “चौथो कान्छिबजार कृषि तथा पर्यटन महोत्सव” सुरु भएको छ। स्थानीय कृषि, पर्यटन, कला तथा संस्कृतिको प्रवर्द्धन गर्ने उद्देश्यले आयोजना गरिएको महोत्सव जेठ ९ गतेसम्म सञ्चालन हुने आयोजकले जनाएको छ।
महोत्सवमा दैनिक रूपमा राष्ट्रिय तथा स्थानीय कलाकारहरूको सांगीतिक तथा सांस्कृतिक प्रस्तुति रहनेछ। आजको मुख्य आकर्षणका रूपमा चर्चित लोक तथा दोहोरी गायिका एलिना चौहान को विशेष प्रस्तुति रहने आयोजकले जानकारी दिएको छ।
त्यसैगरी महोत्सव अन्तर्गत “तेस्रो कान्छिबजार डान्स आइडल” प्रतियोगिता पनि सञ्चालन भइरहेको छ। प्रतियोगिताले स्थानीय प्रतिभावान कलाकारहरूलाई आफ्नो क्षमता प्रदर्शन गर्ने अवसर प्रदान गरेको आयोजकको भनाइ छ।
महोत्सव परिसरमा बाल उद्यान, विभिन्न व्यापारिक तथा कृषि स्टलहरू, स्थानीय परिकार तथा मनोरञ्जनात्मक गतिविधिहरू समेत राखिएको छ। महोत्सवमा स्थानीय उत्पादनको प्रदर्शनी तथा बिक्री वितरणका माध्यमबाट कृषक र व्यवसायीलाई प्रोत्साहन गर्ने लक्ष्य लिइएको छ।
आयोजकका अनुसार महोत्सवले कृषि तथा पर्यटन क्षेत्रको प्रवर्द्धनसँगै स्थानीय आर्थिक गतिविधि चलायमान बनाउन महत्वपूर्ण भूमिका खेल्ने अपेक्षा गरिएको छ।
काठमाडाैं । नेपाली क्रिकेट टोलीका प्रमुख स्पिनर सन्दीप लामिछानेले एकदिवसीय अन्तर्राष्ट्रिय क्रिकेटमा नयाँ इतिहास रचेका छन्। स्कटल्याण्डविरुद्धको खेलमा दुई विकेट लिएसँगै उनले सबैभन्दा कम खेलमा १५० विकेट पूरा गर्ने विश्व कीर्तिमान कायम गरेका हुन्।
सन्दीपले यो उपलब्धि केवल ७३ एकदिवसीय खेलमा हासिल गरेका छन्। यसअघि सबैभन्दा छिटो १५० विकेट लिने कीर्तिमान अष्ट्रेलियाका तीव्र गतिका बलर मिचेल स्टार्कको नाममा थियो। स्टार्कले ७७ खेलमा उक्त उपलब्धि हासिल गरेका थिए।
त्यसैगरी, पाकिस्तानका सक्लिन मुस्ताकले ७८ खेल, अफगानिस्तानका राशिद खानले ८० खेल तथा न्यूजिल्याण्डका ट्रेन्ट बोल्टले ८१ खेलमा १५० विकेट पूरा गरेका थिए।
सन्दीपको नाममा यसअघि नै सबैभन्दा कम खेलमा १०० विकेट लिने कीर्तिमान पनि रहेको छ। उनले ४२ खेलमै १०० विकेट पूरा गरेका थिए। यो सूचीमा राशिद खान दोस्रो स्थानमा छन्, जसले ४४ खेलमा उक्त उपलब्धि हासिल गरेका थिए।
नेपाली क्रिकेटका स्टार खेलाडी सन्दीपको यो उपलब्धिलाई नेपाली क्रिकेट इतिहासकै महत्वपूर्ण क्षणका रूपमा हेरिएको छ।
गुल्मी । गुल्मीको कालीगण्डकी कोरिडोर अन्तर्गत रुद्रवेणी–पुर्तिघाट सडक खण्डमा आइतबार राति भएको मोटरसाइकल दुर्घटनामा दुई जनाको ज्यान गएको छ।
जिल्ला प्रहरी कार्यालय गुल्मीका अनुसार दुर्घटनामा स्याङ्जाको कालिगण्डकी गाउँपालिका–३ भुस्टुङका ३४ वर्षीय लक्ष्मण थापा र ४५ वर्षीय गिरमान सिंह रानाको मृत्यु भएको हो।
प्रहरीका अनुसार राति करिब १० बजे रुद्रवेणीबाट चेमीतर्फ जाँदै गरेको लु ३६ प ३६२७ नम्बरको २२० सिसी पल्सर मोटरसाइकल सत्यवती गाउँपालिका–१ ठुलाबगर छल्दी क्षेत्रमा अनियन्त्रित भई सडकबाट करिब तीन मिटर तल खसेपछि दुर्घटना भएको थियो।
दुर्घटनामा मोटरसाइकल चालक थापाको टाउकोमा गम्भीर चोट लागेको थियो भने पछाडि सवार रानाको टाउको र खुट्टामा गम्भीर चोट लागेको प्रहरीले जनाएको छ। दुवै जनालाई उपचारका लागि प्राथमिक स्वास्थ्य केन्द्र रिडी लगिएको भए पनि उपचारकै क्रममा राति मृत्यु भएको हो।
घटनापछि इलाका प्रहरी कार्यालय जोहाङ र रिडीबाट प्रहरी टोली तत्काल घटनास्थल पुगेको थियो। प्रहरीले दुर्घटनाग्रस्त मोटरसाइकल नियन्त्रणमा लिएको छ।
मृतकहरूको शव पोस्टमार्टमका लागि गुल्मी अस्पताल तम्घास पठाइएको प्रहरीले जनाएको छ।
काठमाडाैं । प्रतिनिधिसभाले संसदीय समितिको बैठक सञ्चालनलाई थप सहज बनाउने उद्देश्यसहित नयाँ नियमावली ल्याउने तयारी गरेको छ। प्रस्तावित नयाँ व्यवस्थाअनुसार अब मन्त्री उपस्थित नभए पनि संसदीय समितिको बैठक सञ्चालन गर्न सकिने भएको छ।
प्रतिनिधिसभाको सोमबार बस्ने बैठकमा प्रतिनिधि सभा नियमावली मस्यौदा समितिका सभापति गणेश पराजुलीले ‘प्रतिनिधि सभा नियमावली मस्यौदा समितिको प्रतिवेदन, २०८३’ माथि छलफल गरियोस् भन्ने प्रस्ताव पेश गर्ने कार्यसूची रहेको छ।
मस्यौदा नियमावलीको नियम १७८ अन्तर्गत विषयगत समितिको काम, कर्तव्य र अधिकारबारे व्यवस्था गरिएको छ। प्रस्तावित उपनियम ४ मा विधेयकमाथिको छलफलका क्रममा मन्त्रीको उपस्थिति अनिवार्य रहने उल्लेख गरिएको छ। तर अन्य कार्यसूचीमा भने आवश्यकताअनुसार मात्रै मन्त्री उपस्थित हुनुपर्ने व्यवस्था राखिएको छ।
हाल कायम रहेको प्रतिनिधिसभा नियमावली २०७९ मा भने समितिका सबै प्रकारका छलफलमा मन्त्री उपस्थित हुनुपर्ने प्रावधान छ। नयाँ संशोधनमार्फत उक्त व्यवस्था परिमार्जन गर्न लागिएको हो।
संसदीय समितिका बैठकहरू मन्त्रीको समय अभावका कारण पटक–पटक प्रभावित हुने गरेको भन्दै यस्तो व्यवस्था आवश्यक भएको रास्वपाका नेताहरूले बताएका छन्। उनीहरूका अनुसार विधेयकसँग सम्बन्धित छलफलमा मात्रै मन्त्री अनिवार्य उपस्थित हुने व्यवस्था गरिएपछि समितिको कामकारबाही प्रभावकारी बन्ने अपेक्षा गरिएको छ।
