पाल्पा । पाल्पामा प्रहरीले लागूऔषधसहित तीन जनालाई पक्राउ गरेको छ। तिनाउ गाउँपालिका–३ दोभानस्थित सिद्धार्थ राजमार्गमा प्रहरीले चेकजाँचका क्रममा उनीहरूलाई पक्राउ गरेको हो।
जिल्ला प्रहरी कार्यालय पाल्पाका अनुसार भदौ १४ गते साँझ करिब ७ः५५ बजे दोभानबाट बुटवलतर्फ जाँदै गरेको लु.प्र.०१–००१ ज ०७१ नम्बरको ईभी हाइस चेकजाँच गर्ने क्रममा उक्त सवारीमा सवार तीन जनाको साथबाट लागूऔषध फेला परेको थियो।
पक्राउ पर्नेमा गुल्मीको रेसुङ्गा नगरपालिका–४ अर्खलेका २५ वर्षीय अंकित खड्का, २५ वर्षीय मेहर सिंह राना र २६ वर्षीय एकराज पन्थी रहेका छन्।
प्रहरीले उनीहरूको साथबाट Nitrazepam २५ ट्याब्लेटका तीन पत्ता तथा खुला अवस्थामा ६ ट्याब्लेट फेला पारेको जनाएको छ।
पक्राउ परेका तीनै जनालाई पाल्पा जिल्ला अदालतबाट सात दिनको म्याद थप गरी आवश्यक अनुसन्धान भइरहेको जिल्ला प्रहरी कार्यालय पाल्पाले जनाएको छ।
