काठमाडौं । काठमाडौंको कुलेश्वरस्थित एभन गा:ड बोर्डिङ स्कुलले श्रावण १५ को अवसरमा ‘हरियो र पहेँलो दिवस’ विशेष कार्यक्रमका साथ मनाएको छ।
नर्सरीदेखि कक्षा २ सम्मका विद्यार्थीहरूको सहभागिता रहेको कार्यक्रममा श्रावण महिनाको महत्व, खिर खाने परम्परा तथा हरियो र पहेँलो रङको सांस्कृतिक र स्वास्थ्यसम्बन्धी महत्वबारे जानकारी गराइएको विद्यालयले जनाएको छ।
कार्यक्रमअन्तर्गत विद्यार्थीहरूले विभिन्न सिर्जनात्मक तथा मनोरञ्जनात्मक गतिविधिमा सहभागिता जनाएका थिए। यूकेजी सेक्शन ‘ए’ का विद्यार्थीले फुकेर रङ मिश्रण गर्ने गतिविधि, यूकेजी सेक्शन ‘बी’ ले बेलुन सन्तुलन प्रतियोगिता, एलकेजी सेक्शन ‘ए’ ले रङ छुट्याउने खेल तथा एलकेजी सेक्शन ‘बी’ ले पहेँलो फलफूलबारे प्रस्तुति दिएका थिए। नर्सरीका विद्यार्थीहरूले ‘जताततै हरियो’ बोलको गीत प्रस्तुत गरेका थिए।
कार्यक्रमको स्वागत सत्रमा यूकेजीका विद्यार्थीहरूले प्राकृतिक सौन्दर्यसँग जोडिएका विभिन्न रङबारे गीत प्रस्तुत गरेका थिए। साथै, शिक्षकहरूले हरिया सागसब्जी र फलफूलको महत्वबारे जानकारी दिँदै स्वस्थ जीवनशैलीका लागि पौष्टिक आहारको आवश्यकताबारे विद्यार्थीलाई सचेत गराएका थिए।
कार्यक्रमको अन्त्यमा सहभागी विद्यार्थीहरूलाई हरियो रङका क्राफ्ट सामग्री वितरण गर्दै ‘हरियो र पहेँलो दिवस’ कार्यक्रम सम्पन्न गरिएको विद्यालयले जनाएको छ।
