काठमाडौं । डिसहोम इन्टरनेटले “Service on Door- SOD” अभियान सुरुवात गरेको छ ।

डिसहोम इन्टरनेटले आफ्ना इन्टरनेट सेवाहरूलाई अझ सहज, छरितो र ग्राहक केन्द्रित बनाउने उद्देश्यका साथ “SOD अभियान औपचारिक रूपमा सार्वजनिक गरेको सोमबार जनाएको छ । उक्त अभियान बागमती प्रदेशअन्तर्गत थानकोट, चन्द्रागिरी क्षेत्रबाट माघ १५ गतेदेखि संचालन गरिएको थियाे ।

यस अभियानअन्तर्गत ग्राहकहरूले डिसहोम इन्टरनेटको सेवा जडान तथा सम्बन्धित प्राविधिक सेवा आफ्नै घरमै प्राप्त गर्न सक्ने व्यवस्था गरिएको छ । ग्राहकको समय र सुविधालाई प्राथमिकतामा राख्दै, कम्पनीका दक्ष प्राविधिक टोलीहरू घरमै पुगेर सेवा प्रदान गर्नेछन् ।

“SOD” अभियान काठमाडौं उपत्यकाबाट सुरु भई चरणबद्ध रूपमा देशका अन्य क्षेत्रहरूमा समेत विस्तार गरिने र यस अभियानमार्फत ग्राहकहरूले वार्षिक रिचार्ज गर्दा विशेष छुट तथा अतिरिक्त सुविधाहरू प्राप्त गर्न सक्ने कम्पनीले जनाएको छ ।

काठमाडौं । निर्वाचन आचारसंहिता विपरित रहेको आवाज उठेपछि प्रमुख राजनितिक दलका नेताहरुको अनलाईन रेटिङ देखाउने रेटडट इकान्तिपुर र रेट माई नेता नामक २ वटा प्लेटफर्म बन्द भएका छन् ।

कान्तिपुर मिडिया ग्रुपले संचालन गर्दै आएको rate.ekantipur माथि प्रेस काउन्सिल र निर्वाचन आयोगको विशेष ध्यानाकर्षणलाई मध्यनजर गरेर बन्द गरिएको सो वेबसाईटमा उल्लेख गरिएको छ । 

यसैगरी ‘रेट माई नेता’ नामक प्लेटफर्मलाई निर्वाचन आचारसंहिता विपरित रहेको भनेर नेपाल दुरसंचार प्राधिकरणले सम्पूर्ण इन्टरनेट प्रदायक संस्थाहरुलाई ब्लक गर्न निर्देशन दिएको थियो । सोही निर्देशनका आधारमा रेट माई नेता नामक प्लेटफर्म पनि बन्द भएको छ ।

निर्वाचनको समयमा उम्मेदवार वा नेताहरूको रेटिङ गर्दा मतदाता प्रभावित हुने र निर्वाचन आचारसंहिता उल्लंघन हुने भन्दै नियामक निकायहरूले यस्ता गतिविधिमाथि निगरानी बढाएका छन् ।

रुपन्देही । प्रधानमन्त्री कप लुम्बिनी प्रदेशस्तरीय पुरुष एक दिवसीय क्रिकेट छनोट प्रतियोगिता सुरु भएको छ । लुम्बिनी प्रदेश क्रिकेट संघको आयोजनामा भैरहवास्थित सिद्धार्थ क्रिकेट मैदान र तिलोत्तमास्थित एक्स्ट्राटेक ओभल क्रिकेट मैदानमा छनोट खेल सुरु भएका हुन् ।

सोमबारदेखि सुरु छनोट खेलमा रुपन्देही र बर्दिया विजयी भएका छन् । रुपन्देहीले कपिलवस्तुलाई ७ विकेट र बर्दियाले पश्चिम नवलपरासीलाई पनि ७ विकेटले नै पराजित गर्दै जित निकालेको हो ।

सिद्धार्थ क्रिकेट मैदानमा पहिलो ब्याटिङ गरेको कपिलवस्तुले निर्धारित ५० ओभरमा ३७ ओभर १ बलमा अलआउट हुँदै १ सय ८ रनको झिनो योगफल बनायो । उसका लागि रौनक श्रीवास्तवले ३१, मोहम्मद सहबाज मुसलमानले २४ र शिव कुँवरले २० रन बनाए । बलिङमा रुपन्देहीका मौसम ढकालले ५ तथा अजय चौहानले २ विकेट लिए ।

जवाफमा रुपन्देहीले १२ ओभर ३ बलमा ३ विकेट गुमाएर १ सय ९ रन बनाउँदै जित निकाल्यो । उसको जितमा देव खनालले अविजित ७५ रनको अर्धशतकीय पारी खेले । यस्तै, आकाश त्रिपाठीले १८ रन जोडे । बलिङमा कपिलवस्तुका महेश भरले २ तथा जीवन मौर्यले १ विकेट लिए । खेलमा मौसम ढकाल प्लेयर अफ द म्याच भए ।

एक्स्ट्राटेकमा भएको अर्को खेलमा सुरुमा ब्याटिङ गरेको नवलपरासीले ४९ ओभर ३ बलमा सबै विकेट गुमाएर २ सय ३५ रन बनायो । उसका लागि जितेन्द्र केवटले ५५, भरतकुमार मगरले ४२, सम्राट भुसालले ३० र दीलिप कुर्मीले २४ रन बनाए । बलिङमा बर्दियाका स्लोप चौधरी र निखिल खत्रीले ३-३ विकेट लिए ।

जवाफमा बर्दियाले ४२ ओभर ३ बलमा ३ विकेट गुमाएर २ सय ३९ रन बनाउँदै जित निकाल्यो । उसको जितमा सुमित श्रेष्ठले १ सय ८ रनको शतकीय पारी खेले । यस्तै, नितेष न्यौपानेले ४२ तथा हर्षल भण्डारी र अशिम गिरीले समान २९ रन जोडे । बलिङमा नवलपरासीका सुमित थापाले २ तथा भरतकुमार मगरले १ विकेट लिए । खेलमा सुमित श्रेष्ठ प्लेयर अफ द म्यच भए ।

माघ २४ गतेसम्म चल्ने छनोट खेलको विजेता र उपविजेता टिमले ट्रफी, मेडल र प्रमाणपत्र प्राप्त गर्नेछन् । यस्तै, प्लेयर अफ द म्याचले ११ हजार १ सय ११ र प्रत्येक दिनको म्यान अफ द म्याचले १ हजार १ सय रुपैयाँ प्राप्त गर्ने खेल संयोजक प्रथम पराजुलीले जनाए । यस वर्षको प्रधानमन्त्री कप चैत्रमा आयोजना गर्ने गरी क्यानले तयारी गरिरहेको छ ।

दाङ । लुम्बिनी प्रदेश सरकारले बुधबार प्रदेशभर सार्वजनिक बिदा दिने निर्णय गरेको छ । 

सोमबार आन्तरिक मामिला तथा कानून मन्त्रालयका प्रदेश सचिव लोक बहादुर सुनारद्वारा जारी सुचनामा माघ २१ गते बुधबार प्रदेश स्थापना दिवसको अवसरमा लुम्बिनी प्रदेशभर सार्वजनिक बिदा दिने निर्णय भएको जनाईएको छ ।

काठमाडौं । फागुन २१ मा सम्पन्न हुन लागेको प्रतिनिधी सभा सदस्य निर्वाचनको समानुपातिक बन्द सुचिबाट ७६ जना उम्मेदवारको नाम हटाउने निर्णय गरेको छ ।

सोमबार आयोगबाट जारी गरिएको प्रेस विज्ञप्तीमा राजनितिक दलहरुबाट पेस भएका उम्मेदवारहरुको बन्दसुचिमा पर्न आएको उजुरी, प्रचलित कानुनअनुसार अयोग्य भएका तथा राजनितिक दलबाट प्राप्त जानकारी समेतका आधारमा उम्मेदवारहरुको नाम हटाईएको जनाएको छ ।

जारी विज्ञप्तिका अनुसार कर्जा सूचना केन्द्रको सुचिमा रहेका २१ जना, प्रदेश सभा सदस्यमा कायम रहेका २५ जना, निर्वाचन आयोगको जरिवाना भुक्तानी नगरेका १० जना, न्यूनतम २५ वर्ष पुरा नभएका ४ जना, मतदाता नामावलीमा समावेश नभएका १ जना, मतदाता नामावलीमा पिछडीएको क्षेत्रमा नरहेका २ जना, महिला हुनुपर्नेमा पुरुष भनि पेस भएका १ जना, राजनितिक दलबाट आएको सुचनाका आधारमा १० जना र अन्य कारण भएका २ जनाको नाम बन्दसुचिबाट हटाउने भएको छ । 

निर्वाचन आयोगमा समानुपातिकतर्फको ११० सिटका लागी ६३ राजनितिक दलबाट ३ हजार २१३ जना उम्मेदवारको नाम पेस भएको थियो । 

काठमाडौँ । आगामी फागुन २१ गतेका लागि तय भएको प्रतिनिधिसभा निर्वाचनको पहिलो हुने निर्वाचित हुने निर्वाचन प्रणालीतर्फको ३९ लाख ९८ हजार मतपत्र छपाइ भएको छ । निर्वाचन आयोगका अनुसार कूल ३० जिल्लाको मतपत्र छपाइ गरिसकेको छ ।

आयोगले जनक शिक्षा सामग्री केन्द्र भक्तपुरमा मतपत्र छपाइ नियमित रुपमा भइरहेको जनाएको छ । समानुपातिक निर्वाचन प्रणालीतर्फको दुई करोड आठ लाख ३० हजार मतपत्र छपाइ यसअघि सम्पन्न भइसकेको छ ।

त्यसैगरी मतदाता शिक्षा प्रयोजनका लागि १० लाख ९८ हजार २०० थान नमूना मतपत्र छपाइ सम्पन्न भइसकेको छ ।

चेन्नई, भारत । दक्षिण भारतको चेन्नईमा बसोबास गर्दै आएका सुदुरपश्चिमेली नेपालीहरूको साझा संस्था सुदुरपश्चिमेली समाजको ९औँ वार्षिक उत्सव भव्य रुपमा आईतबार सम्पन्न भएको छ ।

“सुदुरपश्चिमका लागि सुदुरपश्चिमेली” भन्ने नाराका गठन भएको यस संस्थाले मुख्यतया पश्चिम नेपालको भाषा, कला, भेषभुषा तथा सांस्कृतिक पहिचानको संरक्षण तथा प्रवर्द्वन गर्ने उद्देश्यले राखेको आयोजक पक्षले जनाएको छ ।

उक्त कार्यक्रममा समाजका अध्यक्ष सुरेश तिखातरी, सचिव नरेन्द्र वि.क., अतिथि मानबहादुर साउद, सुदुरपश्चिमेली खड्का समाजका अध्यक्ष लालबहादुर खड्का लगायत समाजका सदस्यहरू तथा विभिन्न संघ-संस्थाका प्रतिनिधिहरूल आ-आफ्नो धारणा व्यक्त गरेका थिए । 

कार्यक्रममा विशेष अतिथिका रूपमा प्रवासी नेपाली सम्पर्क मञ्च तमिलनाडुका सह-महामन्त्री यादव प्रसाद पाण्डे तथा नेपाली एकता समाज तमिलनाडुका अध्यक्ष हेमराज रिजाल, नेपाली समाज तमिलनाडु–पुडुचेरीका अध्यक्ष चन्द्र महराको समेत उपस्थिति रहेको थियो ।

उत्सवका अवसरमा सुदुरपश्चिम प्रदेशको मौलिक संस्कृति झल्काउने सांस्कृतिक नृत्य, गीत-संगीत तथा विविध प्रस्तुतिहरू प्रस्तुत गरिएको थियो । साथै समाजले हालसम्म सञ्चालन गरेका सामाजिक, सांस्कृतिक तथा सहयोगात्मक गतिविधिहरूबारे जानकारी गराउँदै आगामी कार्ययोजनाबारे समेत छलफल गरिएको थियो ।

कार्यक्रमा उपस्थित सम्पूर्ण अतिथि, कलाकार, आयोजक समिति तथा सहभागी सबैप्रति आयोजक पक्षले धन्यवाद व्यक्त गरेको छ । 

समाजले आगामी दिनमा पनि प्रवासी नेपालीहरूबीच एकता, सद्भाव र सहयोगको कार्यक्रमहरूलाई निरन्तरता दिने प्रतिबद्धता जनाएको छ ।